Bê guman, Sûriya weke welat ji demek dirêj ve di rewşeke ne xweristî de dijî, ku alozî û nakokî wê ji der û hindir ve dixwin û hidinr bêtirî derve. Çima hindir bêtirî derve..? ev jî ligorî destûr û yasayên jiyanê yên herî şaristanî û pêşketî ta li ser asta bûneweran bi tevayî çi ajel, nebat, mirov û tiştên dîtir jî, ji her kesî re hatiye çespandin, ku hindir ne saxlem be, ku hindir tev nexweşî û girêk û alozî be, tucarî ruwê derve yê tiştan xweşik nabe, ew tişt çiqasî xwe xweşik bike, çiqasî li hawîr xwe her û bê, herdem dê ruwê wî tiştî çelmisî bimîne, lê dema bi bîrwerî û bi hişekî vekirî û dilekî rast li ser xwe raweste û bi rewşa hindirê xwe ve mijûl bibe, dê ewê karibe hemî nexweşî û aloziyên xwe çareser bike, nemaze ku di dema îro de alav û amêrên xweşkirin û xweşikbûna jiyanê li ser asta kes û civak û welatan ji yên demên berê bêhtirin.

Sûriya weke welat, ji hindir ve welatekî nexweşe, ji serî ta binî di alozî û nexweşiyan de maye, nexweşiyê xwe berdaye kûrahiya hestîyên wê jî, hêdî hêdî li ser agirekî bê deng giyanê wê dişewite, kezeba wê ber bi reşbûnê ve dipişive, her em dikarin bêjin, welatekî kezeb reşî bûye, ji ber gendeliya ku ji demek dirêj ve di hindirê dezgehên wê de diçêre, jibilî konevaniyên kirêtbûn, gendelî, birçîbûn, bêkarî, girtin, devgemkirin, lêxistin, kuştin û çandina tirsê ku di rêya regezên ewledojeh re li ser miletê sûriya bi tevayî û miletê kurd bi taybet tê sepandin. Ji hêlek dî ve, ji ber ku rêjîmê, şêlûbêl û ajawe di karê xwe yî konevanî de hilbijartiye û siyaseteke çewt û ciyawaz û şovînî dijberî hemwelatiyên xwe dişopîne û bi taybet dijberî miletê kurd.

Bê guman, girtin û devgemkirin yek ji wan nexweşiyên herî dijawre, ku li çi deverê be û di çi çax û demê de be, diyardeyeke pirr xerab û bêhûdeye, çiku diyardeyeke dijî azadiya kesayetî û giştiyê ye, di rêya wê re, dengê dadî, maf, wekhevî, azadî û mirovatiyê bin pê dibe.Ev diyarde bêhtir li welatên ku di bin desthelata rêjîmên zordest û diktatorî dene tê bikaranîn, ew rêjîmên ku baweriya xwe bi hebûna fireregeziyê di heman welatî de nînin, û rêjîma sûrî ya Be'es vê siyasetê bi rengekî rojane derbarî miletê xwe dişopîne, li gor nerîn û baweriyên wê ku çi miletên di çarçewa welatê Ereban de dijîn ji xwe ew erebin, û çi kesên di çarçewa dewleta Sûrya de dijîn ew be'esî ne, hemî karker û çotkar, hemî mamosta, nûjdar û endazyar ta kevok û çivîkên li asîmanê wê jî difirin..td, tev be'esîne, ev herdû nerîn ji xwe peyv û guftûgo li ser çê nabe, û çi kesên jiderveyî çarçewa vê nerînê dijminê welatin.

Îca, ev helwest rê li ber hemî nerînên dî digire, ango ev helwest dijî azadiya derbirrîna nerînê ye, û dijî rêbîrên mafên mirovatiyê ye, ji xwe mîna va mafan li Sûriyê peyda nabin, çiku hemî girtiyên siyasî di zindanên Sûriyê de (kurd û ereb) yek ji sedemên girtina wan helwest û nerîn bi xwe ye, tevku nerîna wan ne nerîneke kesayetiye jî, belê nerîna parçeyekî mezin ji civaka Sûriya destnîşan dike, ku ev parçeyê civakê bêpare ji hemî mafên xwe yên netewî û demoqratî û bêpare ji mafê azadiyê. ji alîkî dî ve, nerîna kesên girtî, nerîna civaka Sûriya bi giştiye, ji ber miletê Sûriya bi tevayî ji mafên demoqratî û azadiyê bêparin.

Ligorî vê yekê, kurdên di zindanên Sûriya de, ne di ber nerînên xwe yên kesayetî de têne girtin, mîna Mehmûd Sefo endamê mekteba siyasî ya partiya çepê kurd, helbestvan Hefîz Ebdirehman, xebatkar Miş'el Temo, û bi dehan weke wan endamê partiyên tevgera kurdî li Sûriyê, dema em wisa dibêjin, em vê yekê bi azadî û berpirsyariyê ve girêdidin ligorî nerîna felsefî ji van herdu wateyan re, ji alîkî dî ve, em wê bi daxuyaniya cîhanî ya mafên mirovatiyê ve girê didin, ku desthilata Sûriya çi bayexdan û rêzgirtinê nade hebûn û rûmeta hemwelatiyên xwe, û hemî mafên azadiyên giştî yên bi kesan û civakê ve girêdayîne di sergoyê zordestî û kirêtiyê de dikuje.

 Pirsa herî giring yaku bi rengekî rojane hişê miletê Sûriya bi tevayî û miletê kurd bi taybet mandû dike : Gelo ta kengî dê girtin û devgemkirin berdewam bike.. û ta kengî dê desthilata Sûriya ji siyasetên xwe yên çewt û kirêt vegere, û guhdan û rêzgirtinê ji daxuyaniya cîhanî ya mafên mirovatoyê re bigire..?!.

Rewşa vê pirsê û gelek pirsên dîtir, rewşa miletekî di nav agir de dijîn destnîşan dike, rewşa miletekî ku kêr gihiştiye hestiyê wî berçav dike.

Bê guman li hember vê şewitandinê, ji rêjîma Sûriya tê xwestin ku  li rewşa hindirê xwe bizîvire, taku karibe hemî êş û aloziyên xwe li ser maseya çareserkirinê raxîne, û bi hişekî vekirî regezê guhertinê hilbijêre bo bicîkirina azadî û demoqratiyê ji hemwelatiyên Sûriya bi tevayî re. Her em di wê baweriyê dene ku rengê vê guhertinê, guhertineke aştiyane û demoqratî daxwaza dilê hemî miletê sûriyê ye, ku hemî regezên vî welatî bi hebûna xwe hest bibin, û mafên xwe yên netewî û demoqratî di çarçewa welatekî serbest û hevgirtî de bikarbînin.