Heta di malbatek da jî, ji du birayên ji dê û bavek, yek li ser yê din zulmê bike, meriv dibê ev çi biratiyê? Heqê wî jê bistîne bide jin û zarên xwe, mala wî dabigire û di ser da jî dar bigire here lê bixe, dunya alem dipirse: Ev çi birati ye?

Ji vî jî girantir; mafê axaftinê nediyê, li wî û li malbata wî her rojên xwedê heqaretê bike, wan biçûk bixe, wan mîna beniyan bide xebatê, bizêrîne helbet cîranê bêjin; ev çawa biratî ye?

Birayê li bin zulmê, ji birayê zalim neqete, mala xwe jê cihê neke û jin û zarên xwe negihîne azadiyê, rewşa tê da wek qeder bipejirîne û hîn ji vî jî ecêbtir rabe û rûnê bibêje; „birayê min ê mezin e, çi bike mafê wî ye! Di malbatekê da dibin tiştên wisa..!“

Bêguman derûdor dê bibêje ev çi ehmeqtî ye?

Maf, huqûq, dad, hezkirin, wekhevî divê ji bo biratiyê, ji bo biratiya ji dê û bavek.

Îcar ê me û tirkan kîjan biratî ye?

Tirkên ku ne ji dê û bavên me, tirkên ku ji warên dûr hatine, bi hezar zor û hîleyê welatê me dagirtine û li ser mal û milkên me rûniştine û bi sedan salan e ji bilî kûştin û xirabiyê tiştek neanîne vî welatî, dikeve kîjan kategoriya biratiyê?

Biratiya şêr û rovî?

Em têkiliya xwe û wan, ne hemû tenê; me çawa wan pêşwazî kiriye û wan bi çi çavê li me nihêrîne ji Alpaslan heta îro binirxînin,  gelo em dê çi navê li vê tikiliyê bikin?

.....

Germ e.

Min nedixwest divê kelekela havînê de li ser vê mijara  „biratiyê“ ku di devan da bûye mîna benîşt rabiwestim.

Pir germ e!

Hem tava rojê û hem jî agirê şer Kurdistanê dişewitîne. Hem însanên wê, hem jî dar û ber û çiyayên wê. Her du jî, ji jor va tên:

Hem tava rojê û hem jî bombeyên F16an.

Kî dest bi şer kir? Sebeb kî ye? Nizanim.

Qelemşoriya min têr nake ji bo analîzên kûr ku hun jî pê serwext bibin.

Tiştê ji dîrokê dizanim û heta vê jiyê xwe min bihîstiye:

Her mîna xezebekî şer û kuştin hebûye li ser wan erdan. Riyê rihetiyê nediye ew welat.

Aştî, biratî, dad, maf, tenê mîna benişt tên cûtin li wî welatî.

Dîsa notekî biçûk ji dîrokê: Dr. Mengeleyê nazî ku ji çermên însên abajûran çêdikir, bi şevê vêdixist û bi zewqeke sadîst lê dinihêrî, bi salan xwe veşart lê nekarî xwe ji edaletê xilas bike.

Mengeleyên li Kurdistanê jî, ji poz û guhan tizbiyan çêdikin û hîn li ser kar in.

Xwedê hebîna, hun behsa kîjan biratiyê dikin?