Kurd - 1 ji Xêro Ebbas û Yekbûnê re bela çêkir

Avesta-Televîzyona ku bi navê Kurd-1 tê naskirin û ev demeke dirêje di testê de ye û tê gotin ku ji ber tunebûna kadro û derfetên madî nikare ji weşana testê derkeve, ji gelek hunermenda re bû ye serêşî.

Kurd-1 televîzyona Înstîtuya Kurdî ye li Parîsê. Serokê wê jî serokê Înstîtuyê Kendal Nezan e. Ji dema weşana wê ya testê de, 2 klîpên Yekbûn û Xêro Ebbas têde têne weşandin. Ew klîp ji aliyê Productioneke nenas bi navê “Z” bi awayekî amator hatine çêkirin û rojê bi deh caran têne weşandin.

Çavkaniyeke nêzîkî Roj-tv, Mîr Muzîk- MMC û Akademiya Kurdî ji Avesta re diyar kir ku weşandina wan klîpan di Kurd-1 de, pirsgirêkên mezin ji Yekbûn û Xêro Ebbas re derxistine. Ev dezgeh bi weşandina wan klîpan ne razîne û ew li dijin ku hunermendên ligel wan kar dikin biçin di Kurd-1 de berhemên xwe biweşînin yan jî beşdarî programên wê bibin.

Heman çavkaniyê ji Avesta re got ku Xêro Ebbas gotiye ku haya wî ji wê yekê tune bûye ku Roj tv, MMC, Mir Muzîk û Akademiya Kurd li dijî Kurd-1 in û eger ku wî bizanibûya wî nedihîşt ku klîpê ji wî re çêbikin û di Kurd-1 de biweşînin.

Her wiha ev demeke ku MMC û Roj tv sansur danîne ser berhemên Yekbûn û kêm caran klîpên Xêro Ebbas diweşînin.

Çavkaniya ku nexwest em nav eşkere bikin, got hunermend newêrin xwe nêzîkî Kurd 1 bikin û kesên ku biçin wê televîzyonê wê hemû riyên din yên çalakiyan li pêşiya wan werin girtin.

Ev demeke medyaya nêzîkî PKK li dijî Kurd 1 dinivisîne û wê ji Roj tv re weke alternatîv dibîne.

AVESTA-Navenda Nûçeyan